2008-1-7 15:14
i553041
[b]我希望各位有戀愛經驗的朋友可以幫我解決這個問題...[/b]
解決...不一定可以,邊有話一定可以解決到?
[b]1:我想變得成熟..如何可以?給女生一個安全感..如何做??[/b]
16歲?中三定中四?剛踏入青春期無耐,成熟呢兩個字重未可以同你扯上關係,唔好太刻意希望你自己會變得成熟,年齡所限!我o係你呢個年紀果時,一樣係咁!(直接o的講,你成人身份證都未換,三級片都未入得戲院睇!)so...forget it!
期實安全感...我唔係女仔,我唔知女仔對安全感呢三個字有咩定義同要求,不過以我個人理解...只要做到:「唔好太小白臉,太靚仔,要專一,唔好口花花,別太受女仔歡迎,把口唔好"浪"過油,佢有困難你可以幫到佢解決,你有困難最好唔使佢心煩,對佢千依百順,打電話比你一定要聽,就算真係有事做緊聽唔到,轉頭得閒都一定要覆返佢,有事要搵你幫手如果你手頭上得閒,必定要隨傳隨到,唔好放飛機,大時大節記得要送禮物tum下佢,得閒又要關心下佢,凡事以佢為出發點,多o的從佢角度去諗,為佢著想...總之...多到都講唔晒啦!」你做得到,唔止比到安全感佢,簡直就係100分男朋友!
[b]2:如何可以修補這個問題....我還是愛她....她說過愛我..但口氣很冷淡...我很心痛...如何可以得到她的同意..[/b]
你要先確認,佢冷淡係唔係因為有第三者出現,通常有第三者出現,唔多唔少係有o的跡象睇到出黎,(第三者唔一定係已經追求到,「追求緊」都可以係第三者!),例如平時去去下街,佢接到個電話會望一望你,然後細細聲咁講,講兩句就收線,講完你問佢邊個,佢會話朋友!又或者你約佢出街,佢會話約左人,問佢約左邊個,佢又係話朋友,唔肯講係邊個!你打電話比佢,經常都係入線狀態...(佢可能同第二個講緊電話!)然後催你收線~~
就算出現第三者(追求者),都係有彎轉的,只要佢唔係變左心,決定同第二個一齊,但大前題下,你唔好迫得佢太緊,先不論佢有咩唔開心,咩事都好,佢唔想講就算了!迫得佢太緊會有反效果,佢冷靜一排,覺得你係一個傾訴對象,佢自然會搵返你,而且,你都聽過,勉強無幸福,佢唔想講,就無謂勉強佢喇!或者唔想同你講住,自然有佢o既原因!
既然佢話無左果種感覺,你咪嘗試比返果種感覺佢囉,細細回想返,你係點樣追到佢,用咩方法追到佢?試下比返你初初追到佢果時果種感覺比佢!又例如,你可以諗下,你以前同佢出街,邊次係令佢好開心?(唔好同我講話無!)...點解會令佢開心?回想返,搵到答案,就試下o係佢面前做返出黎!比多o的驚喜佢!
佢個心冷左,你就要嘗試點返著佢,不過Feeling (感覺)呢樣野,其實都好抽象,無乜野方法話可以保證得到,佢會對你有返Feeling的!
[b]3:女生的心..我很難摸索...如何了解女生的心思...請教我
我想你們可以詳盡幫我....感激不盡..... [/b]
係好難觸摸,你同你女朋友只係2年,我同我女朋友就8年了,2000年頭到而家,離離合合都有4-5次,每次話分手最後都一齊返,我同佢一齊咁耐,都未曾完全觸摸到佢心入面諗乜!
一時佢可以好冷淡,一時就好熱情,唉...所以話,女人心,海底針,真係無講錯的!
之所以分手,有好多原因,唔了解,性格唔o岩,第三者介入(追求者),冷淡,無理取鬧等!
最後,因為8年時間o既關係,一齊咁耐,大家有好多回憶無論如何都揮之不去,香港地方細,8年幾乎可以話同佢去過香港每個地方,o係果o的地方留下好多美好o既回憶!分手後諗返起,好痛苦!「分手後一分鐘便有後悔聲音!」
所以,如果感情係經得起考驗,就算有第三者介入追求都唔怕,係你就係你,唔係你強求都無意思,感情係雙方面,唔係你單方面話點就點,例如我同女朋友分手後想再復合,我想之餘,都要佢肯先得架嘛!
我同女朋友都唔止有過一次分手啦,最後大家都係唔捨得對方!所以一次分手不算什麼,將來o既野無人知,有可能復合一o的都唔出奇!
唔係人人都想承受呢種痛苦:
「分開簡單 抹去往事極難
幾多溫馨 燭光晚餐
難以用 斧頭一劈 叫畫面飛散
伴侶沒了 記憶會為患」
節錄自 <何韻詩> - 木紋
你好難去完全了解一個人的,只要你鐘意佢就OK了!
唔好咁心急,比o的時間你同佢冷靜o的先啦!